План за комплетна елиминација на CFCs во Република Македонија
Проектот "План за комплетна елиминација на CFCs во Република Македонија" е уште е еден чекор, но овој пат финален, на Република Македонија во повеќегодишните напори за комплетна елиминација на супстанциите кои се карактеризираат со највисока вредност на потенцијалот на осиромашување на озонската обвивка, популарните хлорофлуоројаглеводороди или CFCs.
Неговата основна цел е обезбедување на навремена, одржлива и забрзана елиминација на CFCs преку унапредување на постоечката легислатива, обука на инволвираните страни, употреба на постоечките залихи, активна партиципација на засегнатите чинители и поддршка од субјектите кои се вклучени во процесот на донесување на одлуки.
Конкретно, проектот ќе се имплементира низ следните фази:
- Преглед на постоечката и подготовка на нова легислатива (во согласност со ЕУ-Директивите од оваа област) поврзана со увозот, извозот и потрошувачката на супстанциите што ја осиромашуваат озонската обвивка;
- Обезбедување на дополнителна опрема за собирање на фреони за сервисерите на разладна опрема;
- Воведување на одржлив систем за едукација за прифатливо управување со CFC-ладилните флуиди во стручните средни училишта за сервисери на разладни уреди и инкорпорирање на собирањето и рециклирањето на CFC-флуидите во нивниот наставен план;
- Ажурирање на постоечкиот систем за континуиран мониторинг на собраните и рециклираните количини на CFC-разладни средства;
- Организирање на агресивна кампања со вклучување на средствата за информирање и невладиниот сектор за запознавање на генералната јавност со превземените активности.
Проектот всушност претставува напредна фаза на досегашниот План за управување со разладните средства и уреди. Новата активност предвидува нова пософистицирана шема на собирање, прочистување и повторна употреба на CFCs во разладните системи:
- евиденција на сервисери кои имаат потреба од опрема за собирање на CFC-фреоните;
- обука за воведување во постапката собирање-рециклирање (прочистување)-повторно полнење на фреоните (повик за обука) - ПРИРАЧНИК за сервисери по ладилна техника;
- доделување на опрема за собирање-рециклирање (прочистување)-повторно полнење на фреоните;
- практична апликација на опремата;
- доставување на извештаи до Канцеларијата за заштита на озонската обвивка за собраните/рециклираните количини на CFC-фреони.
Дополнително, проектот планира обука на цариниците за идентификување и контрола на ЦФЦс на граничните премини и доделување на опрема за детекција.
Новиот пристап во процесот овозможува имплементација на целиот циклус (собирање-рециклирање-повторно полнење) на лице-место, со што ја прави постапката економски поисплатлива како за сервисерот, така и за клиентот. Покрај ова, се намалува можноста за повторно полнење на флуиди кои не се прочистени до степен кој нема да предизвика проблеми во системот.
Активностите за употреба на нови методи за собирање и повторна употреба на CFC-ладилните медиуми даваат можност за строги рестрикции на увозот на супстанциите што ја осиромашуваат озонската обвивка, и тоа по следната рамка:
- 15.000 kg во периодот од 1ви јануари 2006 година до 31ви декември 2006 година;
- 10.000 kg во периодот од 1ви јануари 2007 година до 31ви декември 2007 година;
- 5.000 kg во периодот од 1ви јануари 2008 година до 31ви декември 2008 година;
- да не се увезуваат супстанциите од Анекс А, Група I од Монтреалскиот протокол за супстанциите што ја осиромашуваат озонската обвивка после 31ви декември 2009 година.
Сето ова укажува на фактот дека проектот "План за комплетна елиминација на CFCs" ќе овозможи финализирање на активностите за целосна елиминација на CFCs во Република Македонија и исполнување на обврската кон Монтреалскиот протокол: 100% редукција до 1ви Јануари 2010 година.
• Институционално зајакнување • План за управување и ракување со разладните средства и уреди • Метилбромид •
Канцеларијата за заштита на озонската обвивка, Македонија © 2001-2006 Дизајн на Магма Системи